İnqilabi Hökumətin Bəyanatı
Kuba, GAE və Amerika Birləşmiş Ştatları: dövlət böhtanının anatomiyası
GAE nə qapalı, nə də Kuba dövlətindən kənarda fəaliyyət göstərən paralel bir qurumdur. Əksinə, o, Kuba İnqilabını boğmağa yönəlmiş iqtisadi mühasirəyə qarşı öz effektivliyini sübut etmiş əlaqələndirilmiş cavab mexanizmidir.
Amerika Birləşmiş Ştatları hökuməti Kuba İnqilabını, onun tarixi rəhbərliyini, dövlət rəhbərlərini gözdən salmaq, bununla da həm xalqımızı, həm də beynəlxalq ictimai rəyi çaşdırmaq məqsədilə növbəti dəfə qərəzli şəkildə hərəkət etmişdir.
Bütün bunlar Kuba əsilli Amerika ultrasağçı ideoloqları tərəfindən hazırlanmış və özlərini yaradıcı və gözlənilməz hesab edən dairələrin müəyyən etdiyi fəaliyyət planının tərkib hissəsidir. Onların strategiyası maksimum təzyiq siyasətini görünməmiş və misilsiz həddə çatdırmağa xidmət edən vasitələrdən istifadə edilməsinə əsaslanır.
Mayın 1-də Kubaya qarşı elan olunmuş son sanksiyalar da məhz bu planın tərkib hissəsidir. 14404 nömrəli Sərəncamda əsas hədəf kimi Biznes İdarəetmə Qrupu (GAE) müəyyən edilmiş, bu dəfə isə GAE ilə hər hansı formada əməkdaşlıq edən bütün xarici tərəflərə qarşı yönəlmiş və xüsusilə maliyyə institutlarına təzyiq göstərilməsini nəzərdə tutan “ikinci dərəcəli sanksiyalar”la əlaqələndirilmişdir.
Bu, Kuba–ABŞ münasibətlərinin yaxın tarixində ən sərt, qeyri-mütənasib və təhlükəli eskalasiyadır.
Məqsəd ölkəni diplomatik, ticari, maliyyə və enerji baxımından təcrid etmək, dövlətin dayanıqlığını mümkünsüz hala gətirmək, dialoqu şərtləndirmək və hərbi təcavüz variantlarını qiymətləndirməkdir. Onlar sosial layihəmizin dayaqlarını təşkil edən bütün qurumlara qarşı nüfuzdan salma kampaniyası qurmağa və möhkəmləndirməyə çalışırlar.
GAE Xüsusi Dövrün ən çətin illərində iqtisadi müharibəyə qarşı mübarizə aparmaq məqsədilə yaradılmışdır. O, yaradıcı, milli, yerli və həqiqətən Kuba reallıqlarına uyğun baxışın məhsuludur. Qrupun əsas məqsədi dövlətin sosial nailiyyətləri qoruyub inkişaf etdirməsi, həmçinin ölkənin müxtəlif sahələrinin və sektorlarının tərəqqisinə töhfə verməsi üçün valyuta və digər resurslar yarada bilən müəssisələri birləşdirmək olmuşdur.
Biznes İdarəetmə Qrupunun Vətən qarşısında xidmətləri saysız-hesabsızdır. Bu təşkilatın maddi və maliyyə töhfələri müxtəlif nümunələrdə öz əksini tapır: ölkənin müxtəlif əyalətlərində 10 mindən çox mənzilin tikintisində, uşaqlar üçün pioner düşərgəsinin və istirahət proqramlarının yaradılmasında, eləcə də COVID-19 pandemiyası dövründə Kuba iqtisadiyyatının ayaqda saxlanılmasında.
Bu sahibkarlıq fəaliyyətinin nəticələri həmçinin Holguin əyalətində yerləşən “Lidio Ramón Pérez” (Felton) istilik elektrik stansiyasına yatırımlara, milyonlarla kubalının rifahı naminə həyata keçirilən Şərq–Qərb və Şimal–Cənub suötürmə layihələri də daxil olmaqla iri hidrotexniki qurğuların layihələndirilməsi və inkişafına yönəldilmişdir. Poliklinikalara, ailə həkimi məntəqələrinə və məktəblərə edilən investisiyalar və təmir işləri də buna nümunədir. Bütün bu fəaliyyətlər mütəmadi olaraq Partiyanın, Dövlətin və Hökumətin rəhbərliyinə təqdim edilmiş, eyni zamanda aidiyyəti orqanlar tərəfindən ən yüksək səviyyədə nəzarət və auditdən keçirilmişdir.
GAE nə qapalı, nə də Kuba dövlətindən kənarda fəaliyyət göstərən paralel bir qurumdur. Əksinə, o, Kuba İnqilabını tarix boyu boğmağa çalışan iqtisadi mühasirəyə qarşı öz effektivliyini sübut etmiş əlaqələndirilmiş cavab mexanizmidir.
Partiyanın Mərkəzi Komitəsinin Birinci Katibi və Respublika Prezidenti Migel Dias-Kanel Bermudesin Partiyanın VIII Qurultayında qeyd etdiyi kimi, ilk növbədə İnqilabi Silahlı Qüvvələr daxilində həyata keçirilən müəssisə idarəçiliyinin təkmilləşdirilməsi tarixi əhəmiyyət daşıyır. Sonradan bu təcrübə bütün ölkəyə xidmət etmiş və əldə olunan mühüm nəticələr milli iqtisadiyyatın inkişafına töhfə vermişdir.
Son 30 il ərzində minlərlə kişi və qadın ölkənin resurslarının səssiz keşikçiləri olmuş və yüksək qiymətləndirilməyə layiqdirlər. Onların fəaliyyəti kifayət qədər işıqlandırılmasa da, gördükləri iş öz sözünü deyir və Vaşinqtondan hazırlanan dövlət böhtanından daha güclü səslənir.
Bu gün Kuba xalqının iradəsi Hökumətin İqtisadi və Sosial Proqramında əks olunan dəyişikliklər prosesində ifadə olunduğu bir zamanda, bu təşkilat ölkənin biznes sistemində həyata keçirilən transformasiyaların fəal iştirakçılarından biridir.
GAE nə məxfilik məhsuludur, nə də hər hansı elit qrupların layihəsidir və heç bir halda azsaylı şəxslərin varlanma vasitəsi deyil. Əksinə, o, yolumuz boyunca ABŞ hökumətinin davamlı təcavüzkar siyasətinə qarşı müqavimət göstərməyimizə imkan vermiş çoxsaylı nümunələrdən biridir. Kuba İnqilabının Lideri, Ordu Generalı Raul Kastro Rusun sözləri ilə desək, onun tarixi “nümayişkarlığa yol vermədən, ciddi işlərin görülməli olduğu şəkildə” yazılmışdır.
Havana, 2 iyun 2026-cı il
«Baş Komandan Fidel Kastro Rusun anadan olmasının 100 illiyi ili»
