En azerí::Intervención del ministro de Relaciones Exteriores Bruno Rodríguez Parrilla en el debate abierto del Consejo de Seguridad sobre “La defensa de los propósitos y principios de la Carta de las Naciones Unidas y el fortalecimiento del sistema internacional centrado en la ONU”, Nueva York, 26 de mayo de 2026:
Kubanın xarici işlər naziri Bruno Rodriges Parrilyanın BMT Təhlükəsizlik Şurasında “BMT Nizamnaməsinin məqsəd və prinsiplərinin müdafiəsi və BMT mərkəzli beynəlxalq sistemin gücləndirilməsi” mövzusunda açıq debatda çıxışı
Nyu-York, 26 may 2026-cı il
Cənab sədr, hörmətli daimi nümayəndələr!
Çin Xalq Respublikasının beynəlxalq sülh və təhlükəsizliyin qorunması, beynəlxalq hüquqa riayət olunması, Birləşmiş Millətlər Təşkilatının, xüsusilə də Təhlükəsizlik Şurasının demokratikləşdirilməsi, şəffaflığının və səmərəliliyinin artırılması, Baş Assambleyanın səlahiyyətlərinin genişləndirilməsi, eləcə də suveren bərabərliyə əsaslanan ədalətli və demokratik çoxtərəfli beynəlxalq nizamın qurulması istiqamətində nümayiş etdirdiyi liderliyi yüksək qiymətləndiririk.
Prezident Si Cinpinin irəli sürdüyü və bizim də dəstəklədiyimiz qlobal təşəbbüslər mövcud çağırışların həqiqi çoxtərəfli əməkdaşlıq yolu ilə həllinə xidmət edir. Bu açıq debatın keçirilməsi də bunun göstəricisidir.
1960-cı il sentyabrın 26-da BMT Baş Assambleyasında Ali Baş Komandan Fidel Kastro Rus demişdi: “Talan fəlsəfəsi yox olduqda, müharibə fəlsəfəsi də yox olacaq!” Onun anadan olmasının 100 illiyi münasibətilə bu sözləri bu gün bir daha xatırlayırıq.
Cənab sədr!
Fələstində baş verən soyqırımı, İran İslam Respublikasına qarşı imperialist təcavüzü və Yaxın Şərqdəki müharibəni xatırlatmadan BMT-nin mərkəzi rolunun müdafiəsindən, sülhün və inkişafın təşviqindən, beynəlxalq hüquqa və beynəlxalq münasibətlərin əsas normalarına söykənən beynəlxalq nizamın qorunmasından necə danışmaq olar?
Amerika Birləşmiş Ştatlarının hökuməti faktiki olaraq beynəlxalq sülh və təhlükəsizliyi pozmaqda, beynəlxalq hüququ və beynəlxalq humanitar hüququ Kuba Respublikasına münasibətdə kobud şəkildə tapdalamaqdadır.
Kuba İnqilabının lideri, Ordu Generalı Raul Kastro Rusa qarşı cinayət ittihamlarının irəli sürülməsi mənəvi baxımdan rüsvayçı, hüquqi baxımdan isə ABŞ məhkəmələrinin yurisdiksiyasından sui-istifadə olunması nəticəsində qəbul edilmiş əsassız qərardır. Bu, təyyarələrin vurulması hadisəsinin Kuba ərazisinin hava və dəniz məkanında baş verməsi faktının təhrif olunması, həmin təyyarələrin ABŞ qanunlarını pozaraq tez-tez terror və qeyri-qanuni missiyalar həyata keçirməsi, ABŞ hakimiyyət orqanlarının buna göz yumması və dövlətlərin özünümüdafiə hüququnun inkar olunması ilə bağlıdır.
Bu qərar siyasi motivlidir, saxtadır və 30 il sonra ABŞ və xarici ölkə vətəndaşlarını aldatmaq məqsədi daşıyır ki, onlar Kubaya qarşı “rejim dəyişikliyi” və ya indi evfemistik şəkildə “millət quruculuğu” adlandırılan hərbi avantüranı dəstəkləsinlər.
ABŞ-ın Kubaya tətbiq etdiyi neft və enerji mühasirəsi təsirlərinə görə dəniz blokadasına bərabərdir. Bu isə müharibə və soyqırımı aktıdır. Kuba xalqı onun nəticəsində həyat və mövcudluğunu təhlükə altına alan şəraitdə yaşamağa məcbur edilir və bu, qəddar və ayrı-seçkiliksiz kollektiv cəzalandırma siyasətidir. Bu siyasət artıq ölüm hallarına səbəb olur. Körpə ölüm göstəricisinin hər min diri doğulana görə 4,0-dan 9,2-yə yüksəlməsi və xərçəng xəstəsi uşaqların yaşama ehtimalının 85 faizdən 65 faizə enməsi bunu göstərir.
Hərbi təcavüz qan gölünə səbəb olardı. Minlərlə kubalı Vətəni, müqəddəs dəyərləri və prinsipləri müdafiə edərkən həlak olar, həmçinin heç bir səbəb və ideal uğrunda deyil, imperialist və neofaşist hökmranlıq, talan və işğal siyasətinin zorakılığına sürüklənmiş amerikalı gənclər də həyatını itirərdi.
Mən xüsusilə ABŞ vətəndaşlarına, ilk növbədə gənclərə müraciət edir, onların humanist və sülhpərvər dəyərlərinə səslənirəm və həqiqəti axtarmağa çağırıram. Onların Mayamidəki korrupsiyaya bulaşmış və hakimiyyətpərəst kiçik elit qrup tərəfindən aldadılmasına və manipulyasiya edilməsinə imkan verməmələrini xahiş edirəm. Həmin qrup nə ABŞ xalqını, nə də bu ölkədə yaşayan kubalıları təmsil edir. Çünki onların əksəriyyəti müharibə və enerji blokadası kimi vəhşiliyə qarşıdır.
Belə hərbi hücum əmri verəcək prezident, onu buna təhrik edən dövlət katibi və müdafiə naziri tarixə hərbi cinayətkarlar və insanlıq əleyhinə cinayətlərin birbaşa icraçıları kimi düşəcəklər. Heç bir əsas hərbi təcavüzə və humanitar nəticələrinə görə ona bənzəyən qeyri-insani məcburedici tədbirlərə haqq qazandıra bilməz. Qoyun Kuba sülh içində yaşamasın!
ABŞ hökuməti altı onillikdən artıq müddətdə öz cinayətkar siyasətinə bəraət qazandırmaq üçün müxtəlif bəhanələr uydurub.
Onlar kiçik, lakin rəmzi əhəmiyyət daşıyan adanı nüvə superdövləti üçün guya milli təhlükəsizlik təhdidi kimi təqdim etməyə çalışıblar. Bu isə məntiqə və sağlam düşüncəyə zidd olmaqla yanaşı, tamamilə yalan və əsassız iddialara söykənir.
Prezident Migel Dias-Kanelin dəfələrlə vurğuladığı kimi, Kuba təhlükə deyil və təhlükə ola da bilməz. Kuba ABŞ-ın düşməni deyil və hökumətlərimiz arasında ciddi fikir ayrılıqlarına baxmayaraq, belə olmaq istəmir. Kuba ABŞ xalqı və mədəniyyəti ilə dərin və qardaşlıq əlaqələrinə malikdir. ABŞ hökuməti onların azadlıqlarını məhdudlaşdırsa belə, amerikalı turistləri hər zaman isti münasibət və qonaqpərvərliklə qarşılayacağıq. Eyni zamanda, rəqabətədavamlı layihələri olan ABŞ sahibkarları və şirkətlərini, blokadanın yaratdığı maneələrə baxmayaraq, iqtisadi inkişafımıza ayrı-seçkilik olmadan qoşulmağa dəvət edəcəyik.
Lakin indi korrupsiyaya uğramış və mənəviyyatdan uzaq plutokratiya hökumətimizin guya bacarıqsız və korrupsiyalaşmış olması, eləcə də guya “humanitar böhran” təhlükəsi barədə iddiaları xarici müdaxiləyə bəraət qazandırmaq üçün istifadə edir. Bu fikirləri isə ikiüzlü şəkildə məhz öz hərəkətləri ilə qəsdən, amansızcasına və soyuqqanlılıqla dağıdıcı nəticələr yaradan tərəf səsləndirir. Halbuki belə nəticələr iqtisadi gücündən, inkişaf səviyyəsindən və siyasi sisteminin mahiyyətindən asılı olmayaraq dünyanın istənilən ölkəsində baş verə bilərdi.
Tərəqqinin, xoş niyyətin, ABŞ tərəfinin ciddiliyinin və ardıcıllığının olmamasına baxmayaraq, biz danışıqları davam etdirməyə hazırıq; daxili işlərimizə, siyasi sistemimizə və seçkilərimizə müdaxilə edilmədən ikitərəfli problemləri müzakirə etməyə və terrorizm, narkotik qaçaqmalçılığı, transmilli mütəşəkkil cinayətkarlıq, təhlükəsiz və qanuni miqrasiya, insan alveri, qarşılıqlı iqtisadi kompensasiyalar və digər sahələrdə sivil davranış və çoxtərəfli əməkdaşlıq formaları axtarmağa hazırıq.
Bu, misli görünməmiş və heç bir əsaslandırması olmayan birtərəfli təcavüzdür. ABŞ hökuməti hədə-qorxu və üçüncü tərəflərə qarşı tətbiq edilən “ikinci dərəcəli” sanksiyalar vasitəsilə bütün dövlətləri öz iradələrinə zidd olaraq Kubaya qarşı bu qəddar siyasətdə iştirak etməyə məcbur etmək istəyir. Lakin bu baş verməyəcək.
Beynəlxalq ictimaiyyəti silahlı müdaxilə, enerji mühasirəsi və sərtləşdirilmiş blokada yolu ilə yaradıla biləcək humanitar fəlakətin qarşısını almaq üçün səfərbər olmağa çağırıram. Çünki bunlar da insanları öldürür və əzab verir.
Latın Amerikası və Karib hövzəsi ölkələrini regionun Sülh Zonası statusunu qorumaq və sabitliyi poza biləcək nəticələrin qarşısını almaq üçün hərəkətə keçməyə çağırıram.
Siyasi fərqlərdən, ideoloji yanaşmalardan və tarixi ziddiyyətlərdən asılı olmayaraq, bütün dövlətlərin milli maraqlarına, xalqlarına və suveren hüquqlarına zərər vuran bu özbaşınalıqların qarşısını almağın vaxtıdır.
Qlobal Cənub buna görə mübarizə aparmalı və kollektiv şəkildə özünü mümkün təzyiqlərdən qorumalıdır. Mən təvazökarlıqla bildirirəm: Kuba ilə həmrəylik vaxtı yetişib. Kuba hər zaman başqaları ilə həmrəy olub, hətta ölüm təhlükəsi və maddi çətinliklər qarşısında belə bundan geri çəkilməyib.
BMT-nin mərkəzi rolunun müdafiəsi, sülh və inkişafın təşviqi, Təhlükəsizlik Şurasının beynəlxalq sülh və təhlükəsizliyin qorunmasında əsas məsuliyyəti və siyasi həll yollarının təşviqində rolu haqqında danışarkən, bu Şuradan Kubaya qarşı hərbi təhdid və enerji blokadası məsələsində heç olmasa öz əsas mandatını yerinə yetirməyə çalışmağı istəmədən keçə bilmirəm. Eyni zamanda, BMT Baş Assambleyasını da Kubadakı vəziyyətlə bağlı xalqların ona verdiyi geniş, həlledici və demokratik səlahiyyətlərdən qətiyyətlə istifadə etməyə çağırıram.
Qoy heç kim şübhə etməsin ki, heç vaxt baş verməsini istəmədiyimiz bir məqam gəlsə, Kuba xalqı sonadək mübarizə aparacaq.
Vətən, ya ölüm – biz qalib gələcəyik!
Diqqətinizə görə təşəkkür edirəm.
(Kubanın Xarici İşlər Nazirliyi – Cubaminrex)