İnqilabi Hökumətin Rəhbərliyinin Məlumatı
ABŞ hökumətinin Mərkəzi Kəşfiyyat İdarəsinin (CIA) direktoru Con Retkliffin rəhbərlik etdiyi nümayəndə heyətinin Havanada qəbul olunması ilə bağlı müraciətindən sonra İnqilabın Rəhbərliyi bu səfərin həyata keçirilməsini və nümayəndə heyətinin Daxili İşlər Nazirliyindəki müvafiq tərəfdaşları ilə görüşünü təsdiqləyib.
Görüş mayın 14-ü ikitərəfli münasibətlərin mürəkkəb xarakter aldığı bir şəraitdə, mövcud vəziyyətin həllinə yönəlmiş səylərin bir hissəsi kimi, hər iki ölkə arasında siyasi dialoqa töhfə vermək məqsədilə baş tutub.
Kuba tərəfinin təqdim etdiyi məlumatlar və ABŞ nümayəndə heyəti ilə aparılan müzakirələr Kubanın ABŞ-ın milli təhlükəsizliyi üçün təhdid olmadığını, eləcə də onun guya terrorizmi dəstəkləyən ölkələr siyahısına daxil edilməsinə heç bir qanuni əsasın mövcud olmadığını qəti şəkildə nümayiş etdirməyə imkan verib.
Görüş zamanı ölkəmizin terrorizmin bütün forma və təzahürlərinə qarşı mübarizə və onu birmənalı şəkildə pisləmək məsələsində tarixi mövqeyinin Kuba hökuməti və səlahiyyətli qurumlarının fəaliyyəti ilə tam uyğun və ardıcıl olduğu bir daha təsdiqlənib.
Bir daha vurğulanıb ki, ada dövləti terrorçu və ya ekstremist təşkilatlara sığınacaq vermir, onları dəstəkləmir, maliyyələşdirmir və ya fəaliyyətlərinə imkan yaratmır. Həmçinin ölkə ərazisində xarici dövlətlərə məxsus hərbi və ya kəşfiyyat bazaları mövcud deyil və Kuba heç vaxt ABŞ-a qarşı düşmən fəaliyyətləri dəstəkləməyib, bundan sonra da Kuba ərazisindən başqa dövlətlərə qarşı fəaliyyət göstərilməsinə imkan verməyəcək.
Bundan əlavə, hər iki tərəfin hüquq-mühafizə və qanunun tətbiqi sahəsində fəaliyyət göstərən qurumlar arasında əməkdaşlığın inkişaf etdirilməsində maraqlı olduğu, bunun həm iki ölkənin, həm də regional və beynəlxalq təhlükəsizliyin maraqlarına xidmət etdiyi qeyd olunub.
Havana, 14 may 2026-cı il
