Qeyri-rəsmi tərcümə
2025-ci ilin Adi Yubileyi ruhunda Kuba Dövləti cəza çəkən insanları azad edir.
Kuba Xarici İşlər Nazirliyinin bəyanatı.
Vatikan Dövləti ilə sıx və səmərəli münasibətlərin bir hissəsi olaraq, Kuba hökuməti Papa Fransisk və onun nümayəndələri ilə əlaqə saxlamış və keçmişdə olduğu kimi, bizim ədliyyə sisteminə xas olan və İnqilabın humanitar yolunu xarakterizə edən təcrübəmizin bir hissəsi olaraq, azadlıqdan məhrum edilmiş şəxslərin nəzərdən keçirilməsi və azad edilməsi prosesləri haqqında Zati-müqəddəslərini məlumatlandırmışdır.
Bu təcrübənin təzahürü kimi və milli qanunvericiliyin müddəalarına uyğun olaraq, 2023-2024-cü illər ərzində azadlıqdan məhrum etmə növündə cəzaya məhkum edilmiş 10 mindən çox şəxs qanunvericilikdə nəzərdə tutulmuş müxtəlif növ güzəştlərlə azadlığa buraxılmışdır.
2022-ci ilin avqustunda Xarici İşlər Naziri Bruno Rodriges Parrilla ilə keçirilən görüşdən sonra, 2023-cü ilin iyununda Prezident Migel Diaz-Kanel Vatikana səfər etdi və Papa Həzrətləri ilə görüşdü. Digər maraq doğuran məlumatlar arasında bu görüşlərdə bu mövzuya toxunuldu və ABŞ-ın Kubaya qarşı siyasətinin ədalətsiz mahiyyəti və zərərli təsirləri dərindən müzakirə edildi. Zati-müqəddəslərii Kuba xalqına rəğbət və məhəbbətini bariz şəkildə göstərdi.
Yanvarın ilk günlərində Prezident Diaz-Kanel Papa Həzrətlərinə məktub ünvanlamış və məktubda Həzrətləri tərəfindən elan edilmiş və yenicə başlamış 2025-ci ilin Adi Yubileyi ruhuna uyğun olaraq, qanunla nəzərdə tutulmuş müxtəlif cinayətlərə görə müvafiq qaydada mühakimə olunan 553 nəfərə azadlıq verilməsi barədə qərar elan etdiyini bildirmişdir. Azadlığa buraxılmalar qanunvericilikdə nəzərdə tutulan müxtəlif üsulların diqqətlə təhlili əsasında və Kubanın cəza və penitensiar sistemlərinin ədalətli və humanitar xarakterinin bir hissəsi kimi həyata keçirilir. Bu insanlar tədricən öz müavinətlərini alacaqlar.
Biz Vatikan və Papa Həzrətləri ilə hörmətə əsaslanan, səmimi və konstruktiv əlaqələr saxlayırıq ki, bu da mövcud qanunvericiliyin müəyyən etdiyi tələblər, Kuba ədliyyə sisteminin humanitar ruhu və daxili nizam-intizam və vətəndaş təhlükəsizliyi ilə bağlı öhdəliklərə riayət edilməsi çərçivəsində bu yaxınlarda qəbul edilmiş qərar misalında, qərarları asanlaşdırır.
Havana, 14 yanvar 2025-ci il