Kuba ABŞ-ın iqtisadi mühasirəsinin yeni mərhələsini qınayır və pisləyir
İnqilabi Hökumət ABŞ hökumətinin Kubaya qarşı apardığı siyasətdə yeni eskalasiyanı, ölkəmizə yanacaq tədarükünün tam şəkildə qarşısını almaq cəhdini ən kəskin şəkildə pisləyir.
ABŞ Prezidentinin 29 yanvar 2026-cı ildə qəbul etdiyi sərəncamı guya milli fövqəladə vəziyyətin mövcud olduğunu bəyan edir və bunun əsasında Kuba ilə neft ticarəti aparan ölkələrdən idxal olunan məhsullara ticarət rüsumları tətbiq etməyi nəzərdə tutur.
Bu qədər ifrat tədbiri əsaslandırmaq üçün sözügedən sərəncamda Kubaya qarşı yalanlar və böhtan xarakterli ittihamlar yer alır. Onların arasında Kubanın ABŞ-ın milli təhlükəsizliyi üçün “qeyri-adi və fövqəladə təhlükə” təşkil etməsi kimi absurd iddia xüsusilə diqqət çəkir. Prezidentin özü və onun hökuməti anlayır ki, bu cür uydurma arqumentlərə heç kim, ya da çox az adam inanır, lakin bu onları narahat etmir. Kuba əleyhinə təcavüzlərini əsaslandırmaq naminə onların həqiqətə, ictimai rəyə və dövlət etikası prinsiplərinə göstərdikləri hörmətsizlik məhz budur.
Bu qərarla ABŞ hökuməti şantaj, hədə-qorxu və üçüncü ölkələrə birbaşa təzyiq yolu ilə Trampın ilk prezidentlik dövründən etibarən Kubaya yanacaq idxalına mane olmaq məqsədilə həyata keçirilən iqtisadi boğma tədbirlərinə əlavə təzyiq mexanizmləri tətbiq etməyə çalışır. Bu, ABŞ-ın xarici siyasətini güc yolu ilə aparmasının və imperialist hegemonluq ambisiyalarını reallaşdırmaq cəhdlərinin təhlükəli formasını möhkəmləndirir. Elan edilənə əsasən, həmin ölkə suveren dövlətlərə hansı ölkələrlə ticarət edə biləcəklərini və məhsullarını kimlərə ixrac edə biləcəklərini diktə etmək hüququnu öz üzərinə götürür.
ABŞ Prezidentinin sərəncamı beynəlxalq hüququn açıq-aşkar pozulması olmaqla yanaşı, Latın Amerikası və Karib hövzəsinin Sülh Zonası elan edilməsi haqqında Bəyannaməyə də ziddir. Bu sənəd bir daha sübut edir ki, regionun və dünyanın təhlükəsizliyi, sabitliyi və sülhü üçün real təhdid məhz həmin ölkənin hökumətidir.
ABŞ hökuməti bu nöqtəyə 67 il ərzində suverenliyə, sosial ədalətə, sülhün və beynəlxalq həmrəyliyin təşviqinə əsaslanan, həqiqi və legitim siyasi-inqilabi prosesi məğlub etmək və məhv etmək cəhdlərinin iflasa uğramasından sonra gəlib çatmışdır.
Kubanın ABŞ hökuməti ilə beynəlxalq hüquqa, suveren bərabərliyə, qarşılıqlı hörmətə, qarşılıqlı faydaya əsaslanan, daxili işlərə qarışmamaq və dövlətlərin müstəqilliyi ilə suverenliyinə tam hörmət prinsipləri çərçivəsində ciddi və məsuliyyətli dialoqa daim hazır olduğu tarixi faktlarla geniş şəkildə sənədləşdirilmişdir.
Hamıya məlum olduğu kimi, o cümlədən ABŞ hökumətinin özünə də, Kuba ABŞ üçün, onun milli maraqları və ya vətəndaşlarının rifahı üçün heç bir təhlükə təşkil etmir. Əksinə, həmin vətəndaşlar hökumətləri onlara imkan verdikdə, adaya səfərləri zamanı hər zaman hörmət və qonaqpərvərliklə qarşılanıblar. Kuba heç bir ölkəni təhdid etmir və ona qarşı təcavüz etmir. Beynəlxalq ictimaiyyət tərəfindən sanksiyalara məruz qalmayıb. Sülhpərvər, həmrəylik nümayiş etdirən və əməkdaşlığa açıq bir dövlətdir.
Bu, həm də mübariz və dözümlü xalqın ölkəsidir. İmperializm, iqtisadi təzyiq və milyonlarla insana əzab vermək cəhdləri ilə Kubanı bir daha ABŞ-ın hökmranlığı altına salmaq niyyətinə qarşı xalqın iradəsini sındıra biləcəyini düşünməklə böyük yanlışlıq edir.
Beynəlxalq ictimaiyyət qarşısında qaçılmaz bir məsələ dayanır: bu cür cinayətkar siyasət gələcəyin göstəricisi olacaqmı, yoxsa sağlam düşüncə, həmrəylik və təcavüzə, cəzasızlığa və sui-istifadəyə qarşı mövqe üstün gələcək?
Biz bu yeni hücuma qətiyyətlə, təmkinlə və haqqın tam şəkildə bizim tərəfimizdə olduğuna əminliklə cavab verəcəyik. Qərar dəyişməzdir: Vətən ya Ölüm! Biz qalib gələcəyik!!